Mangpaendek

To paratui to diratui, to massua to disua. Iana makassing ngasanmo cadokkona, dipaumi tee kada tangsibujuran. Tabeq unamo toda buda-buda tee lako kitaq sola ngasan, to diratui. Nadeteqmi wattunna tee too sukkuruqkiq mappuji lako Puanglataqla tangdiangge-anggei. Na ia to baca salawaqtaq lako Nabittaq tangmahkegangkaq. Jaji, sukkuruqkiq mappuji lako Puanglataqla, anna den sabbaraq pole jio mai jajahanna Nabittaq. 

Jaji nadeteqmi wattunna tee too, tee allo, karuen tatteq appaq kumua, sitammumikiq tee sikita rupa, to diratui to paratui. Ia to tau jio mai muane nasangai kalena to kumua, "Mangtallang diujunmokan kamiq tee, pole jio mai palasa makatiq, pole jio mai tanduk mataran, mpangngolo malebu-lebui kalekiq, anna ia tee allo too indeqi Baraka kaqtu rengngeqna, leqto lembahna." 

Nasanga kalena to kumua lao jiongmokan mai, mangngaqpaqna tana soloh, jao mai malillungna langiq, ntiroi sangbuku sangrarakiq, to ntorroi kada tongan, nnandikki pepasan. Na kisangami kalekiq to pole jio mai muane, "Llembahmokan kaluku mangtundunan, ssaririmokan kalosi mangngeqtengan, njujungmokan pare mangbulian, ntiroi tee to ntorroi kada tongan, nnandikki pepasan." 

Jaji lako kitaq sola ngasan, mangngolomokan tee to pole jio mai muane, sukkuruq tarima kasiqmokan tee too, tiballahmi to ampah kiratui, natitimbak toomi to eran. Jaji anggemi tee akkattakiq to pole jio mai muane. 

Jiomira mai baine tee la mbalii kada sangbuku duang bukukiq, "Tabeq unamo buda-buda tee jio mai kamiq to baine dikkaq. Masainmokan ngkallutanni damah ssulunanni api, ssiokanni wai to tau pole jio mai palasa makatiq, tanduk mataran, kua kenna ia mammo dikkaq mpekutanankan, nasabaq kamiq tee mai kamiq na to inda to inda, ke ia unamo kamiq, to tau napugauk to nturuqi passuroan, niniri pappesangka, ngkalajaq liluq wattu, masiriq ntattang sunnaq, iara tee to kipurannu gaja. Ia to lekoqna anu pura ngasan. Jaji iamo tee pangrannuangkiq to jio baine, masanggingmo tibukka erangkiq ntajanni to tau alleqtoan lembahna, ngkaqtuan rengngeqna. Iamo to disanga ntorroi kada-kada tongan, nnandikki pepasan. Dennaa upaqtaq dalleqtaq tee kasiturutantaq sola ngasan too. Anna ia to nasabaqi tee tacadokkoan too tapellao tulunganni naliu sauq liu reweq, anna mario sininna daun kaju ngkitai, anna takkappo to tallu naratui dau, anna pakei tammatua malolo punala. Anggemi tee to pole jio mai kamiq baine, kamuqmora to tosaleanan, ke denpi panggallahmi." 

Jaji paccappuranna tee kada la messekonmira to tedong jao buntu. Namembebah to bale jiong tasik. Anna kammaq ia to asu lowoq, kammaq ia to manuk jaja, tangkekkua to manuk, tangmangbongka to asu. Anna ola massola duanna dau, mpugauk anu hallalaq, mpugauk anu to tapurio sola ngasan, nasabaq cumbiaqmi to kilaq, memmaqtumi to galugu, anna ratu ambeq Bacoq sola indo Bacoq. Jaji ia tee rengngeq sola lembah ambeq Bacoqmora ia sola indo Bacoq a la ssambungngi. 

Jaji susimi tee to disanga kada sangbuku dipangngoloangkiq sola ngasan, edda sirundunan anna diaccappuri. Paccappuranna tee kada dipahpeawapi, to kumua saten-tenni ia to muane to kumua, iana liu sauq paoqtonanni iana liu reweq batu lambenanni. Iana lan kadellekan mahkada mesai. Iana seen kalambunan, tongan paui to muaneri sesena anu tongan. Dennaqa upaq, anna mellolloq karuen pecoqna/kacolliqna, namentaruk makaleq ambongna anna putuo ngkasiwianni Puanglataqla.