Tallu Batu Papan

Curitanna tana Duri namenjaji Tallu Batu Papan.
Susii tee pammulanna. Menuruq to mangka nacuritannaq tojolomo lako puang Baroko, tonna mangparenta indeq Alla taun 1964-1968. Pada too to mangka nacuritannaq bapaq Abdul Manan Mappasanda, na ia toopa to nacurita to matua-tua jio kampong, ke sicuritanaq tikianuq. Susi tee lao-laona. Ia to nanii batu aririnna sia to puang lanni Duri-Duri. Iamo tee nanii assaqna to kapuangan indeq Duri, disanga Salumbun Diduri. Salumbun Diduri sialai Camanina lan mai Baroko. Menuruq curita tomatua, ia to neneqna baine pole jao mai langiq. Ia to ambequrena disanga Karang Ulu sialai Tomalangke jaja Tator. Jaji Camanina anakkurenai Karang Ulu. Jaji Tator na Baroko sangrapangngi to tosileqto, nasabaqi sirampeananni Karang Ulu na Tomalangke. Ia tee kasirampeananna Camanina na Salumbun aqpaq anak najajian. Tallu baine mesaq muane. Anak pammungah disanga kaka Kamariang, Kamariang, adi Kamariang. Ia to tampak disanga Kapatoha, iamo muane. Ia tonna matonggo ngasanmo tee anakkana, nakuamo Salumbun sola Camanina, "Laqbih, ke dibagean memanmi padang tee mai anak. Danggiq nasisala-sala dau, ke tangpakullemikiq." Jaji nabage tallumi tee tana Duri. Nomoroq mesaq Alla, nomoroq dua Malua, nomoroq tallu Buntu Batu. Na ia to ntorroii Alla Kamariang. Ntorroii Malua, kaka Kamariang. Ntorroi Buntu Batu adi Kamariang. Na ia Kapatoha, sanga jaji muanei, dipapolei tama Baroko, iarika polei lako batu aririnna to pangngadaran, nasabaq pole jioi mai assalanna Camanina. Jaji Alla dibage dua poleqi, indeqna saqdan na sambaliqna saqdan, iarika Alla na Baroko. Jaji Alla na Baroko pada-pada kakuasanna indeq Duri. Tapi ia ke denni parallunna messun lan mai tana Duri, Allara mbawa sanga. Iamo nadikuara Tana Duri Tallu Batu Papan, battuanna tallu pada-pada kakuasanna. Na ia to mpannassai kumua Baroko pada kadudukanna tee Tallu Batu Papan, sama turuqi nggaraga pangngadaran to la disamaturuqi lan kampong, nateqda nawaqding ditengkaii. Inda-inda ntengkaii iarika llanggarri, la tangnapaendek mata jarun, iarika teqda napukassingngi. Susimi joo sanggenna jio Tondok disangai Tondok Sampean Toketan Bajunna to puang. Jio ntee Tondok digaragai mesaq salassaq, namaneq jio ntee bola dianna to pakean adaq to la napake lako karajaan laen. Susinna ia ke la malei Kapatoha lako Malua, sabaq parallui sikita Kaka Kamariang, nasulleii joloq pakeanna jio Tondok, napakei pakean adaqna Malua, namaneq male lako Malua. Susi too ke Buntu Batu, Alla la male tama Baroko. Na inda-inda la messun lan mai Duri, la male noq Endekan iarika male req Makale, nasulleii joloq pakeanna jio Tondok, pakean adaqna Tana Duri napake male. Iamo tee mpannassai Tallu pada-pada, aqpaq tangsipacauran. Jaji Tallu Batu Papan bicaranna, sabaq mesaqra Indo, mesaq Ambeq, mesaqra pammulanna. Lan Duri batu aririnna, sanggenna dikua to-Duri, bicara to-Duri. Ia Endekan, Makale na Baroko padai to sileqto, nasabaq Baroko sirampeanni Tana Toraja iarika Makale. Na ia to si Endekan napada to sileqto, nasabaqii tonna mangrari Endekan, sirari to pole jiong mai Bugiq, namale Baroko sola Makale mbantui, sanggenna patalo Endekan. Ia tonna mangkamo to rari, nakuamo Endekan, "Na apamo tee la kubenni sia pake jao mai, na matanaqmokan tee bantuantaq." Nakuamo Pake Baroko sola Makale, "Na apa o la tabengkan? Ia to waramparan cappuq, tapi ia to penawa tangcappuq, battuanna laqbih makassing to sikita sileqto." Jaji nakuamo Endekan, "Ia ke susii tuu, la malekan deq Duri tasibasse." Teqda namasain, ratumi Endekan jio Toqkulo sitammuanni Baroko na Makale. Ia tanda kasibasseanna nggereqi mesaq tedong bonga. Nakuamo Pake Baroko, "Na apamo la diala tanda kasiunuran." Nakuamo Makale sola Endekan, "Pakera ia jao mai Baroko, umbo to nasanga tuju." Jaji nakuamo Pake Baroko, "Ia ke susi tuu, sisulle nginangkiq." "Baroko jaja Makale loq." "Baroko jiong Endekan jao." Susimi tee to tanda kasiunuran sola tallu, na ia tee balulang tedong bage duai, Makale sangpiak, Endekan sangpiak. "Pada garagai ulang" "anna tapada nneqteqi jio mai kampongtaq," "nasitammu ntee." Ia tonna mangkamo pada nagaraga ulang, pada naeqteqmi jio mai kampongna, na ia ulang rariqna Endekan tangpadateqi. Jaji nakuamo Pake jao mai Baroko, "Umpuq bangmi ulang lekoq." Ia tonna mangkamo diumpuq, nakuamo Pake Baroko, "Apa dipasiumputanni?" Nakuamo Pakena Endekan, "Belajen." Jaji ia ke susii tuu, ia tee kampong dinii disangai Belajen. Jaji susi toomi tee lao-laona tee ibu kota kecamatan nadisanga Belajen. Susimira kapang tee curitanna tana Duri, to pammula garontoqna to puang indeq Duri anna menjaji to Tallu Batu Papan, sijajian kadanna, iamo disanga bicara to-Duri. Na ia tee curita tangsukkuqpa, tuqtuan unapakan nnangai. Iarika mpekutananni lako to matua-tua, umbo nakua cara nakullei gannaq iarika sukkuq. Susinnamo teqdapa nadiissen pammula denna Salumbun, muanerika bainerika, susi to Camanina, pokoqna pammulanna to to-Duri. Jaji kupuminasai lako olo malaqbihtaq to mbacai tee curita, ke denni tangsukkuqna, tagannaqii, ke taissenni. Ia ke denni kada-kadanna tassala, taaddampangannaq buda-buda. Dennoq upaq natuli mbarakkaqikiq Puang Allataala. Amin, tarimai Puang.

Dorongan Anda sangat berharga bagi kami