Iana den madoang mangkabua’ dangke, den jolori tedongta’ ia’rika sapinta’, to puramo keanak nabiccu’ unapa anakkana. Saba’ ia to dikabua’ dangke dadikkinara to sapin ia’rika tedong. Jaji ia to tedong diandu’ra jolo’ nadiala to dadikkina. Iana den mangngandu’, dipakandei to tedong, dikua nara’da jio nginanna, danggi’ nakamale-male. Iana tedong malaira, digalungngi danggi’ napundiu-diu.
Iana den la mangngandu’mo, dipacucuii jolo’ to anakkana, dikua nacekka to dadikkina. Iana cekkamo, dialanmi pangpanianan to malo’bok, dinii mpanii dadik ke diandu’mi. Ia ke la mangngandu’ki’, dipissi’-pissi’i to cucu sapin, namane’ diparra to timu cucunna. Iana diparramo, ciccoromi to dadikkina, na ia jo’ dadikkina dipatanannimi to pangpanianan malo’bok nena’. Iana den puramo mangngandu’, dialami to dadik, nadipatama kurin, mane’ dipatoppo’ jao dapoh, dinasu sanggenna lonta-lonta. Iana lontamo, dipatamaimi lite bandiki’, to pura dipasicampuru’ wai. Iana te’da lite bandiki’, wa’ding dialan daun bandiki’ ia’rika kaloang bandiki’, diparra, namane’ disaring. Ia jo’ lite bandiki’ nena’, dipatamami ntu’ jo’ dadik lonta-lonta sici’di’-sici’di’, sanggenna mangtekkemi jo’ dadik.
Iana mokkongmo, diangka’imi namane’ dipasisarak to mangtekkena na ia to wainna. Ia jo’ mangtekkena ia’rika jo’ mokkongna dipado’mi lauk kebulu, to to’tok pollo’na, namane’ diassa’, dikua namamara jo’ dangke. Ia jo’ dadikkina nena’ wa’ding diiso’ ia’rika dipangco’boran, ke kumande Na iana den madoang nannai jo’ dangke, dice’laii, dikua natahan sipatang bongi.
